ABŞ və İsrailin aylarla davam edən hava hücumlarına baxmayaraq, İran özünün raket və pilotsuz uçuş aparatları (PUA) istehsal edən zavodlarını qoruyub saxlaya bilib.
Konkretfakt.info Oxu.az-a istinadən xəbər verir ki, bu barədə “Bloomberg” agentliyi mənbələrə istinadən məlumat yayıb.
Mənbələrin məlumatına görə, Tehran hələ də kifayət qədər ballistik raketlərə və gəmi əleyhinə silahlara malikdir, həmçinin atəş gücünü sürətlə bərpa etmək qabiliyyətindədir. Agentliyin həmsöhbətləri hesab edirlər ki, Vaşinqton tərəfindən aviazərbələr yenidən başlayacağı təqdirdə, İran asimmetrik müharibə strategiyasına keçid edə bilər.
Nəşr qeyd edir ki, İranın hərbi imkanları ilə bağlı bu cür qiymətləndirmə Tramp və onun administrasiyasının dəfələrlə səsləndirdiyi bəyanatlarla ziddiyyət təşkil edir. Ağ Evin mətbuat katibi Anna Kelli istehsalat müəssisələrinin qorunub saxlanılması barədə iddiaları rədd edib. O, agentliyə bildirib ki, “Gecəyarısı çəkici” əməliyyatı zamanı İranın nüvə obyektləri, “Epik qəzəb” əməliyyatı gedişində isə ölkənin istehsalat obyektləri, ballistik raketləri və hərbi dəniz donanmasından ibarət “ənənəvi müdafiə qalxanı” məhv edilib.
Bununla belə, agentlik xatırladır ki, Tramp noyabrda keçiriləcək aralıq seçkisinə qədər genişmiqyaslı hücumlara fasilə verib. “Bloomberg Economics”in təhlükəsizlik üzrə aparıcı eksperti Bekka Vasserin sözlərinə görə, yaranmış bu sükut İrana “qaçılmaz olduğunu bildiyi” yeni hərbi əməliyyatlar dalğasına hazırlıq görmək üçün vaxt qazandırır.
“Bloomberg Economics”in təhlilləri göstərir ki, fevralın 28-dən etibarən İran 4 mindən çox qanadlı raket və ən azı 2 min ballistik raket buraxıb; iyun ayında Qərb kəşfiyyat xidmətləri Tehranın silah ehtiyatlarının müharibədən əvvəlki səviyyənin dörddə üçü həcmində olduğunu ehtimal edirdi.
Mütəxəssislər İranın hərbi-sənaye kompleksinin dayanıqlığını təmin edən bir neçə amili diqqətə çatdırırlar:
– gəmi əleyhinə raketlərin istehsal prosesinin nisbətən sadə olması;
– Çinə məxsus köhnə gəmi əleyhinə raket modellərinin istehsal texnologiyalarından istifadə edilməsi;
– ölkənin cənub ərazilərindəki dağların istehsalat gücləri üçün təbii sığınacaq rolunu oynaması.
Digər Yazılar
No Comment! Be the first one.